A Asociación de Empresari@s de Deza (AEDEZA) celebrará este luns a súa asemblea xeral ordinaria -ás 20.15 horas na primeira convocatoria ou ás 20.30 horas na segunda convocatoria- para aprobar a memoria de actividades e as contas anuais de 2023, o orzamento de 2024 e unha proposta de actualización das cotas de afiliación, que permanecen invariables desde o ano 2013, co obxectivo de poder mellorar e ampliar os servizos que se prestan aos asociados e asociadas.
O presidente da AEDEZA, David Campos, xustifica dita proposta de actualización das cotas no feito de que “levan 11 anos sen modificarse e o custo da vida subiu para todos neste tempo, e a AEDEZA non é unha excepción”. Ademais, subliña que “nos últimos 11 anos a asociación foi implementando novos servizos e mellorando notablemente os que xa viña prestando de vello, asumindo os custos adicionais sen repercutilos nos socios/as”.
“Neste momento, no que estamos inmersos nun proceso de dixitalización e modernización, para a asociación é importante reforzar a autonomía financeira, non para obter beneficios, senón para ser máis sustentable e para que a prestación dos servizos, que cada vez son máis e mellores, non sexa deficitaria”, explicou o presidente.
“Unha actualización moi razoable”
A proposta que a xunta directiva someterá a aprobación por parte da asemblea xeral establece que a cota de 16,33 €/mensuais para os asociados/as de 0 a 5 traballadores, que son o grupo maioritario, pasaría a ser de 25 €/mensuais; para o grupo de 6 a 20 traballadores, pasaría de 39,25 €/mes a 45 €/mes; para o grupo de 21 a 50 traballadores, pasaría de 62,17 €/mes a 70 €/mes; e para o grupo de máis de 50 traballadores, pasaría de 65,43 €/mes a 75 €/mes.
David Campos considera que trátase dunha “actualización moi razoable”, especialmente tendo en conta que “a calquera asociado/a que aproveite as vantaxes da AEDEZA, xa non é que lle salga a cota de balde, senón que poderá aforrar máis de 1.000 euros ao ano”. Así, tal e como afirmou esta semana nunha rolda de prensa, o presidente enfatizou que “as empresas que non están afiliadas á AEDEZA están a perder cartos”.
“Esta actualización é necesaria para reforzar a saúde financeira da AEDEZA e desde a xunta directiva confiamos na comprensión e sensatez dos asociados, aos que lles pedimos que veñan á asemblea xeral, porque alí xustificarémoslles con exemplos e cifras que ser socio/a da AEDEZA é moi rendible”, concluiu o presidente.
