A Asociación de Empresari@s de Deza (AEDEZA) participa no programa Xuventude Mentoring na Empresa, impulsado pola Dirección Xeral de Xuventude da Xunta de Galicia, como entidade beneficiaria dunha subvención que posibilitará que 12 persoas mozas maiores de 18 anos de idade poidan realizar estadías formativas en empresas ou entidades públicas ou privadas, vinculadas a sectores económicos estratéxicos de Galicia.

Xuventude Mentoring na Empresa é un programa da Consellería de Cultura, Lingua e Xuventude orientado a reforzar a formación práctica das persoas mozas e a incrementar as súas posibilidades de inserción laboral a través de estadías formativas en empresas ou entidades públicas ou privadas, vinculadas a sectores económicos estratéxicos de Galicia. Trátase dun programa cofinanciado pola Xunta de Galicia (Consellería de Cultura, Lingua e Xuventude) e pola Unión Europea a través do Programa FSE+ Galicia 2021-2027.

A finalidade deste programa é reforzar a empregabilidade e as habilidades e competencias profesionais das persoas mozas inscritas no Sistema Nacional de Garantía Xuvenil (SNGX), non ocupadas e non integradas nos sistemas de educación ou formación, contribuíndo á mellora da súa formación mediante a adquisición de experiencia profesional para a súa incorporación ao mercado de traballo.

Os obxectivos específicos do programa Xuventude Mentoring na Empresa son:

• Potenciar os programas de educación non formal nos que as persoas mozas adquiran os coñecementos e habilidades máis demandados no contexto laboral actual.
• Achegar ás persoas mozas á realidade empresarial e mellorar a súa autonomía persoal.
• Crear un ecosistema favorable á creación de oportunidades de emprego xuvenil.
• Favorecer a captación e retención de talento en sectores económicos clave para a economía galega.

Os sectores económicos que a Xunta de Galicia considera estratéxicos e nos que deben operar as empresas que acollan aos mozos e mozas seleccionados no programa son os seguintes:

• Agroalimentación
• Automoción
• Biotecnoloxía
• Automoción
• Enerxías renovables
• Madeira/Forestal
• Metalmecánico
• Naval
• Pedra natural
• Téxtil/Moda
• Tecnoloxías da información e a comunicación (TICs)
• Calidade de vida e benestar

Os/as destinatarios/as finais do programa Xuventude Mentoring na Empresa son as persoas mozas que cumpran os seguintes requisitos:

• Ter feitos os 18 anos e non superar a idade máxima que estableza a normativa vixente do Sistema Nacional de Garantía Xuvenil (SNGX), que é de 30 anos.
• Estar empadroadas na Comunidade Autónoma de Galicia cunha antigüidade mínima dun ano.
• Estar inscritas no Sistema Nacional de Garantía Xuvenil como beneficiarias no ámbito da Comunidade Autónoma de Galicia.

A través do programa Xuventude Mentoring na Empresa, a Asociación de Empresari@s de Deza proporcionaralles ás 12 persoas mozas seleccionadas como participantes o seguintes beneficios:

• As persoas mozas participantes recibirán unha bolsa de formación cun importe de 690,67 euros mensuais, que poderán incrementarse en 100 euros nos casos de persoas con discapacidade e noutros 100 euros para desprazamentos, cando a estadía non sexa no concello de residencia do/a participante.
• Recibirán unha formación complementaria de 60 horas lectivas e titorización durante as estadías.
• As horas formativas nas entidades ou empresas nas que se realizarán as estadías terán unha duración mínima de 100 horas mensuais e un mínimo de catro días semanais.