Un total de 29 comercios lalinenses dos sectores da moda, calzado, lencería, óptica, complementos, perfumaría, artesanía, téxtil do fogar e decoración participarán desde este xoves ata o sábado nunha nova edición da feira Stock Outlet organizada pola Asociación de Empresari@s de Deza (AEDEZA) e o Centro Comercial Aberto (CCA) de Lalín coa colaboración da Dirección Xeral de Comercio da Xunta de Galicia e o Concello de Lalín.
Os 29 establecementos participantes, que estarán identificados con carteis de gran formato, moqueta de cor azul na entrada e globos, son os seguintes: Akebia, Alalá Nikis Lalín, Ana Blanco Centro Óptico, C&C Young Trend, Calzados Alca, Calzados Senra, Colorín Colorado, Cris Abad, Dándara, Federópticos Pereiro, Foot on Mars, G-Básico, Guerra, It´s Man Only, It´s Only, Karen, Lencería Lilas, Mi Casa Lalín, Moca, Mombai Artesanía, Montoto, Muchas, Multiópticas Lalín, Nereida Novias, Ninfa, Saber Vivir, Thebes, Ve de Íntima e Zapatería Martínez.
O presidente da AEDEZA, David Campos, destaca que os comercios que participan neste Stock Outlet ofrecerán “descontos ata o 80% en artigos e produtos de rebaixas e procedentes de campañas anteriores”. “Con este formato de outlet, que se desenvolve nas propias tendas, todo o mundo gaña, porque os clientes poden acceder a ofertas moi atractivas e as tendas teñen a oportunidade de darlle saída ao stock que acumulan de tempadas anteriores sen incorrer en gastos adicionais”, apunta.
