A Asociación de Empresari@s de Deza (AED) está a preparar unha reclamación conxunta polos danos e prexuízos ocasionados aos asociados polo apagón rexistrado na xornada de onte por mor dunha avaría na liña Chantada-Lalín e que impediu a moitas empresas e autónomos desenvolver a súa actividade durante preto de catro horas.
Tras asesorarse esta mañá na Consellería de Economía, Emprego e Industria e coa Federación Galega de Parques Empresariais (Fegape), a AED seguirá dúas liñas de traballo: por unha banda, recompilará información sobre o número de socios afectados e os prexuízos ocasionados para presentar unha reclamación administrativa conxunta diante da Consellería de Economía, Emprego e Industria para dirimir responsabilidades e esixir as accións correctoras necesarias para que este tipo de incidencias non se volva producir; e por outra banda, tendo en conta que as reclamacións particulares que pretendan conseguir compensacións deberán tramitarse de forma individual a través de demandas diante do Xulgado Mercantil, a AED contactará por correo electrónico cos asociados e porá o seu servizo de asesoramento xurídico á disposición dos afectados para indicarlles o procedemento a seguir.
Ademais, o presidente da AED, Antonio Lamas, transmitirá á empresa distribuidora a “necesidade e urxencia de acometer os traballos para completar o anel de subministro e evitar unha única liña de abastecemento”.
